نه تسبیح و نه تقدیس و نه قرآنیله مشغولم
بو گونلر من کنار بوس جانانیله مشغولم
سوزنده گوزلرین جانان دوشور اعصابمه لرزه
وجودیم خسته دیر پیوسته درمانیله مشغولم
دخی وعظ ایلمک ممکن دگیلدور بنده یه چونکی
اصول دینه واقف هم فروع دینه عارف دور
جمیع احکامه دارا بیر مسلمانیله مشغولم
خیالیم وار یازام شرح کتاب حسن آیینه
دواته توکموشم چرنیل قلمدانیله مشغولم
ید بیضاسی وار ناز ایلمکده عشق ساتماقدا
رموز عشقه واقف بیر سخندانیله مشغولم
یوزی گل کاکلی سنبل دهانی پوسته بوی بسته
گهی ناف مدور گه زنخدانیله مشغولم
منی یالقوز قویون یاریمله ای یاران سیزی تاری
بو گونلرده. نه دینیله. نه ایمانیله. مشغولم
مژده ای خاطر پژمرده کی دلبر گله جک
جان ساراییندا امیر اولماغا سرور گله جک
یئنه ده دل بولبولی باشلادی فغان ائیله مگه
مگر اول سرو گول اندام سوسنبر گله جک
نفس باد صبا غالیه سا اولدو مگر
او ساچی نافه تر زولفی معنبر گله جک
گئده جک محنت و اندوه و غم و درد و عنا
یئرینه راحت و شادی و صفالر گله جک
شب فرقت گئده جک محنت و هجران گئده جک
صبح وصل ایریشر و مهر منور گله جک
نئجه بیر سعی ائدیبن وصلینه ایریشمک اوچون
دم فطرتده نه کیم اولدو مقدر گله جک
سن نگار ایله "نظامی" منی عالمده دخی
صنما سانما کی بیر بی دل و دلبر گله جک
سالدی هیجران اودونا اول بت مه پاره منی
ائیله دی زولفوتک هیجرینده گونو قاره منی
درد طغیانیمه بیجا یئره زحمت چکمه
تاری شاهددی طبیب اؤلدورو بو یاره منی
قیلدی کونلوم قوشونو حلقه زولفونده اسیر
وار خیالی چکه منصور کیمی داره منی
سرکویوندا وطن قیلمیش ایدیم دیلدارین
اوزدو وصلیندن الیم ائیله دی آواره منی
من تک عالمده غم و درده گرفتار اولسون
کیم کی حسرت قویوب اول مهوش دلداره منی
سن بو حسنیله زلیخای جهانسان ای مه
نولا عشقین چکه یوسف کیمی بازاره منی
واحدا زولف نیگاریم اینجه لدی تنیم
کیم گؤرو بنزه دیر اول زولفده بیر تاره منی